مع كل نسمة هوا بهالطقس الخريفي بسبّحك يا ربّ بهالصباح المبارك، وبشكرك عا نعمة الحياة اللي عطيتني ياها بهالنهار الجديد.
وببداية هاليوم، بقلّك يا ربّ بدّي كون خادمك وإتبعك، وبدي كون مطرح ما بتريدني كون، بكل أمانة.
وتا كون خادمك بدي كون متل حبة الحنطة اللي بتموت كرمال تعطي ثمر، وأنا يا رب عم إسعى وجاهد تا كون عم موت عن ذاتي وأنانيتي تا أعطي ثمار المحبة والتواضع والسلام.
ورغم كل الصعوبات اللي بواجها واللي رح واجها بهالنهار، رح حاول إنّي كون عم مجّد إسمك بكل موقف باخدو تا تتمجّد إنت فيي بكلّ لحظة.
وبكل لحظة من لحظات هالنهار رح حاول كون عم شوفك قدامي وتكون إنت الهدف اللي عم بسعى تا اوصلو وإرتاح فيك.
/الخوري يوسف بركات/
