صباحك يا رب مليان رجا وصبر ومحبة يا ربّي يسوع.
وهالرجا هوي بالصبر عا كل التجارب اللي بتعترضلنا طريقنا للسما، لعندك يا عريسنا السماوي.
ومتل ما انت ساكن بيناتنا وفينا تا تحمينا من الموت الأبدي، بتريدنا نعطي ثمر دايماً، وثمرنا هوي محبتنا وأعمالنا الصالحة، وهوي طريقنا للسما وفيها منعبّر عن حبّنا وإتّحادنا فيك يا ربّ الحياة.
ما في وقت للإستسلام بهالحياة يا ربّ، لأنو الإستسلام دعوة للموت والعتمة.
ونحنا منّا أبناء العتمة ولا أبناء الموت، نحنا أبناءك ، أبناء النور وأبناء الحياة فيك يا ربّ.
ما بدنا نسمح للشرّ يتغلغل عا قلوبنا تا يدمّرا ويعطّلا تا ما تعطي ثمر، نوّرنا يا ربّ بنورك تا نفهم كلامك إنّو اللي ما بيعطي ثمر هوي ميت واللي بينما بحبّك وبمحبّة البشر بينال الحياة معك.
/الخوري يوسف بركات/
