صباح اليقظة والاستعداد هوي صباحنا معك يل ربّ.
بيجي عا راسي سؤال يا ربّ، كيف بيقدرو ناس، ومنّن كتار من المسيحيّين، انّن يتّهموك بإنّك بتصنع الشرّ بالعالم متل ما بتصنع الخير؟ ما انت الخير المطلق واللي بتدافع عنّا بقوّة تا تسكب فينا ذاتك بكلّيتا يا نبع الحياة.
ما في غير الشرّير هوّي وحدو اللي بيحاول يزرع فتنة بعقولنا، وانت اللي بتدعينا للتوبة تا نصير حبّة قمح صالحة للعطاء، لأنّك يا ربّ ما بتريد حدا يموت خاطي.
قدّيش في اشخاص كانو بعاد عنّك وصارو بنعمة منّك قراب لإلك اكتر من أي شخص تاني؟
علينا نحنا انّو نثبت فيك لأننا كمان معرضين، نحنا القراب، انّو نبعد عنّك اذا استسلمنا للشرّير وتجاربو.
وعلينا كمان انّو نبشّر بكلمتك وحدا اللي بتعطي الحياة وبتردّ كل خاطي لإلك.
/الخوري يوسف بركات/
