صباح الأمل والرجا، هيدا صباحك يا ربّ، بشكرك لأنّك عم بتصبّحني بكلمة الفصل : اليوم.
اليوم، بهالكلمة، تمّمت كلّ اللي انكتب عنّك إنّك جايي تمنح السلام.
جيت تدعيني تا آمن وإتشجّع.
عم تدعيني تا آمن وإتشجّع لأنّك بتحبّني بكل مراحل حياتي.
حبّيتني لدرجة إنّك نزلت لعندي تا تعيش معي.
حبّيتني بكلّ وسخي وأغلاطي.
حبّيتني للموت والقيامة.
عم تدعيني تا آمن وإتشجّع وإقبل ذاتي متل ما هيّي وبكلّ شي فيا، وخلّي الروح القدس يحلّ عليّي تا أقدر إتخطّى التجارب.
عم تدعيني تا آمن وإتشجّع وإقبل ذاتي متل ما هيّي وما جرّب كون غير شخص، ولا إسعى تا أوصل لمراكز عا حساب الناس.
بعرفك بتحبّني إلي، يا ربّ، ومش القناع اللي بلبسو بكتير أوقات.
رح تسألني إلي :
"شو عملتلّي بهديّة الحياة اللي عطيتك ياها تا تحبّا وتعيشا بي ملآى؟".
رح بتضمّني إلي بحضنك، يا ربّ....
بعرفك ناطرني.
/الخوري يوسف بركات/
