اليوم، وبهالصباح المبارك، الخلايق كلها بصوت واحد وبقلب صافي بتسبّحك وبتمجّدك يا ربّ السما والأرض.
يا ربّي يسوع، كيف فينا نتصوّر المقام اللي حطّيتنا فيه، نحنا ابناءك وبناتك، وكشفتلنا ياه بصلاتك الكهنوتية، وهوي انّا نكون كلنا، كجماعة، واحد فيك؟
وتا نستاهل هالمقام اللي محضّرلنا ياها، ما فينا الا ما نعيش الوحدة معك، بيّ وخيّ وصديق، ونفعّل عالوحدة بثباتنا بمحبّتنا لبعضنا البعض.
ومصدر هالوحدة اللي دعيتنا الها، هوي الحب المرتكز عالاتحاد فيك يا الله الثالوث الاقدس.
يا ربّ، قديش بدنا نضل غرقانين بضعفنا البشري، ومسحورين بالانانية وبالخطية؟
منطلب رحمتك وحنانك علينا يا رب. شيلنا من ضياعنا، بعّدنا عن روح البغض والكراهية والحسد، تا نقدر نحيا معك وفيك بالعالم اللي نحنا فيه.
/الخوري يوسف بركات/
