صباح المعرفة والثبات فيك هوي صباحك يا ربي يسوع.
لمن منسمع كلامك مع الله الآب ومنشوف قديش حبّيتنا لدرجة انّك بدّك يانا نكون معك بالمجد السماوي، ما فينا الا ما نحسّ باندفاع وشوق لنلتقيك، ونبلش نشتغل عا ذاتنا تا نستحق هالمكان اللي حضّرتلنا ياه.
يا رب، اكيد العالم ما بيعرفك لانو عايش بروح العالم. وياما بأوقات كتير نحنا ما منعيد نعرفك لمّن مننجرف بروح العالم اللي بيحاول يحط غشاء على عيون قلوبنا وافكارنا تا يبعدنا عنّك.
ونحنا منعرف يا رب، انّك جيت عا هالدني تا تعطينا الحياة بملآا وتكون النا مثال الانسان الصالح نقتدي فيك تا نوصل عالسما.
نحنا تلاميذك يا رب، ورسلك بهالعالم، ومن خلالنا بدّك تغيّر القلوب المتحجّرة وتصيّرا قلوب بتعرف تحب متل ما انت حبيتنا، ونكون بمحبّتنا وتعاملنا مع بعضنا البعض شهادة لملكوتك عالأرض.
/الخوري يوسف بركات/
