صباح الحق وحقيقة والحقيقة هوي صباحك اليوم يا رب.
كلامك يا يسوع شهادة حقيقية لحياتنا. قديش العالم بحاجة، اليوم، وبعالمنا، لصدق بالكلام وبالاعمال، وانت يا الهنا الحبيب بدك يانا نشهد لإلك بين الناس ويكون همّنا الوحيد بهالحياة هوّي انّا نحمل صورتك لكلّ اللي منلتقي فيون تا يعرفوك من خلالنا.
قدّيش العالم، وخاصة مجتمعنا، بحاجة لرعاة على مثالك يقودو كنيستك وشعبك، عا دربك، بالمثل الصالح والتعليم الصحيح.
قدّيش العالم، ومجتمعنا خاصة، بحاجة انّو يبعد عن كل اللي همّن السلطة والتسلّط وحبّ المال والانانية.
خيارنا انت يا رب، راعينا ومعلّمنا الاوحد. ومعك منعرف الطريق اللي رح نبقى ماشيين فيا رغم الصعوبات. هالطريق هيي الوحيدة اللي بتوصّلنا للفرح السماوي معك.
/الخوري يوسف بركات/
