مع إشراقة شمس هالصباح، بسبّحك وبمجّدك يا إلهي وحبيبي يسوع المسيح.
بشوفك يا ربّ عم بتجادل اليهود اللي آمنو فيك والفريسيين اللي كانو عم ينتقدوك، وعم تقلّن إنّو ما بيكفي الإنسان يتعلّق بالممارسات الشعبيّة اللي بتفرضا الشريعة وقوانينا وواجباتا.
بشوفك عم بتفهّمن إنّن أولاد إبراهيم وبتحاول توعّيهن عا إيمانن، بس هنّي كانو مصرّين عا عماهم وقساوة قلوبن لأنّن ما عم بيعيشو الإيمان اللي عاشو إبراهيم.
بشوفك يا ربّ عم تدعيني وتدعي كل إنسان مآمن فيك إنّا ننتقل من مرحلة الشريعة وممارساتا، لمرحلة العلاقة البنويّة المبنيّة عالمحبّة المطلقة.
بشوفك يا يسوع عم بتشدّدنا إنّو نتشبّه بإيمان جدودنا القدّيسين ونحاول نعيش حياة التسليم لإلك متل ما كانو مسلّمين ذاتن وحياتن كلّا لمشيئتك لأنّك أحلى بيّ وأغلى خيّ وأوفى صديق.
/الخوري يوسف بركات/
