صباحك يا رب هوي صباح المحبة والفرح.
واليوم عم بتصبّحني بكلامك المليان تشجيع انّو المهم بالحياة هوي الداخل ومش الخارج.
اليوم عم تدعيني تا فوت لعمق ذاتي وشوف حالي انا مين؟ أنا الفريسي واللا أنا تلميذك؟
كتير من الأوقات أنا الإنسان، بسأل حالي إذا أنا الفرّيسي عم عيش التقوى المزيّفة وبصير أحكم عالناس وصنّفن، واللا أنا تلميذك اللي عم حاول شوفك بالآخر وحبّو متل ما حبّيتني؟
أنا متل هالفرّيسي، عم إتطلّع بالناس بنظرة فوقيّة، واللا أنا تلميذك عم إزرع صورتك من خلال عيشي التواضع بمجتمعي؟
أنا الجاهل ما بدّي آمن إنّك معي وبكلّ لحظة من حياتي، واللا أنا رسولك المتأكّد إنّك بقلبي وبفكري وبكلّ حواسي؟
يا ربّ، ما بدّي كون الفريسي، اللي ما بيهمو اللا المظاهر، بدّي كون إبنك عم إسعى دايمًا إنّي فعّل الوزنات اللي حاططا فيّي وإستثمرا بالأعمال الصالحة اللي بتمجدك؟
/الخوري يوسف بركات/
