صباح الكرامة هوي صباحك اليوم يا ربّي يسوع.
كتير من الاوقات بسأل حالي يا ربّ: معقول، اذا كنت محل أهل بيتك وشفتك عم تعمل هالآيات والمعجزات، وما آمن فيك؟ معقول كون متلن وما اعرفك؟ شو رح بتكون نظرتي لإلك؟ معقول اسجنك بمكان وزمان؟انت اللي جيت عالعالم كلّو ومش لشعب معيّن.
انت اللي بعتت رسلك تا يبشّرو الأمم كلّا.
انت اللي جيت عالأرض وانت منّك من الأرض، تخلّيت عن عالمك اللي هوّي السما تا تجي وتخلّصني من عالم الأرضيات.انا الانسان المعمّد، اذا ما رح آمن فيك يا ربّ انّك الله اللي عم تتجسّد كل يوم بحياتي، رح ضلّ بعيد عن الانجيل وعن رسالة الانجيل، وما رح افهم من الانجيل شي.
انا الانسان المعمّد باسم الثالوث، اذا ما رح آمن فيك انّك المعلّم الأوحد، رح ضل بحالة الجهل الروحي.
انا الانسان الممسوح بزيت البنوّة، اذا ما رح آمن انّك ملكي والهي ومخلّصي، رح ضلّ بحالة ضياع وما في حدا غيرك بيرجعني لحظيرتك يا ملك الملوك.
/الخوري يوسف بركات/
