صباحي بيمتلي سلام لمّن بيبتدي فيك يا ربٍي يسوع المسيح.
كيف بدي، أنا الإنسان الخاطي الضعيف، انّي عيش بحسب ما بتطلب مني يا ربّ؟أوقات كتير بحاول افهمك بعين العقل فا بوصل لطريق مسدود لأني بتوقّف عند هويتك البشريّة.
وهيدا الشي تا توعّيني على انّي اعرفك بالإيمان اللي هوي عطيّة منّك واللي بيخلّيني منفتح عليك.
اليوم بتعطيني، يا ربّ، الجواب الشافي والكافي لمّن بتأكّدلي بإنّك الخبز النازل من السما.
انت الحياة الجديدة والحلوة اللي جيت من السما تا تفوت عا كياني كلّو وتسكن فيه وتتغلغل بكل عروقي وتجدّدني وترجّعني انسان مليان من كرامتك، واعترف فيك انّك غذائي الروحي الوحيد، وما انسى ابدا قدّيش بتحبّني، وضلّ مآمن انّك بتقوّيني وماددلي ايدك تا امسكا وامشي معك وانمى بحياتك المليانة حبّ وفرح وسلام مهما اشتدت الظروف الحياتية والمعيشية والاجتماعية.
/الخوري يوسف بركات/
