صباح الإبتسامة والكلمة الحلوة هيدا صباحي معك يا ربّ.
بهالأحد المبارك اللي فيه بتخيّل العدرا إم الكلّ جايي تا تزور هالختيارة أليصابات وجايبتلا معا الفرحة والإبتسامة والكلمة الحلوة، من بعد ما بشّرا الملاك بالحبل الالهي.
شو حلو هاللقاء اللي عم يجمعك يا ربّ بالانسان.
بسلامك اللي قالتو مريم لأليصابات، فِرِح يوحنا ببطن إمّو.
عم بتخيّل العدرا ببسمتا الحلوة، جايي توقف حد أليصابات اللي بحاجة لمين يوقف حدا.
عم بتخيّل العدرا حاملة الفرح بقلبا من إله الفرح اللي بأحشائها وعم تعطيه لأليصابات اللي رقصت فرح بلقاء ربّا وإمّ ربّا.
شو حلو يا ربّ تكون لقاءاتنا مليانة من كلمتك ومن سلامك اللي بيزرعو فينا الفرح.
لازم نوعا بقا ونبعد عن كلّ شي ما إلو طعمة واللي ما في من وراه إلّا الأذية، ونكون رسل سلام حاملينك للعالم متل ما حملتك العدرا لأليصابات ويوحنا وللبشريّة كلّا.
/الخوري يوسف بركات/
