صبحية مع الرب

بصباح هالنهار المجيد، منرفعلك كل التسبيح يا ربّ السما والأرض ومنشكرك عا كل نعمك وعطاياك اللي عم بتفيضا علينا بحياتنا اليومية.

سؤال منضلّ نسألو عا حالنا وعا كل المرجعيات: كيف الانسان بيصير قدّيس يا ربّ؟ واذا ما عمل عجايب ما بيصير قدّيس؟ ومنكتشف اننا بعاد عن الايمان فيك.

دايما منكون مادّيّين، بدنا كلّ شي ملموس تا نصدّق أحاديثك ونتبعك، بينما القداسة هيي بالحياة اللي عشتا قدامنا واللي بتدعينا نتشبّه فيا.

والشهادة الك يا ربّ، حتى الاستشهاد، هيي اللي تميّز فيها القدّيسين.

هيدي هيي الشهادة اللي بتدعينا اننا نعيشا.

هيي التخلّي عن حبّ الذات، متل ما عمل القدّيس ماما اللي ما تنازل ولا يوم عن حبّو لإلك يا يسوع.

مع القديس ماما الشهيد، منعلن اننا رح نحاول يا ربّ نحطّك الهدف والغاية لحياتنا، ونعرف نستشهد عن شهواتنا تا نقدر نشهد لإلك بمحيطنا.

/الخوري يوسف بركات/