صبحية مع الرب

بصباح هالنهار المميّز، منرفعلك يا ربّ عقولنا وقلوبنا فعل شكر لإلك على حضورك الدايم بيناتنا.

كيف ما بدنا نفكّر فيك دايما يا ربّ، ونحنا ما منقدر نعدّ المرّات اللي عم بتكون حاضر فيها معنا وخاصة بوقت الضيق؟

كيف ما بدنا نحبّك يا ربّ من عمق أعماق قلوبنا وانت اللي حبّيتنا وعطيتها ذاتك وافتديتنا بموتك عالصليب؟

كيف ما بدنا نصلّيلك يا ربّ، وانت اللي صلّيت للآب السماوي كرمالنا وكرمال ما نوقع بالتجربة؟

كيف ما بدنا نحسّ فيك يا ربّ، وانت اللي عم تهمس بقلوبنا انّك بتحبّنا وانّك باقي معنا لمنتهى الدهر؟

كيف ما بدنا نقعد عند اجريك يا ربّ ونصغي لإلك، وما في حدا بيعطينا السلام والفرح والراحة غيرك؟

كيف ما بدنا نتلذّذ فيك يا ربّ، وانت النبع اللي بتفيض عذوبة وأمل وحياة وحب؟

بس الصعوبة عم بتكون فينا، نحنا اللي ما عم نعرف نحسّ فيك، ولا عم نعرف نقدّملك شي منّا، لهيك بدنا ياك تقوّينا تا نثبت فيك ونحبّك اكتر واكتر يا اله الحبّ.


/الخوري يوسف بركات/