صبحية مع الرب

منسبّحك يا ربّ ومنمجّدك ومنباركك بنهاية هالاسبوع ومنتمنى تكون نهاية حياتنا الارضية الزايلة هيي بداية لحياة جديدة ابدية معك بالملكوت السماوي.

يا ريتنا منعرف منيح ومنتأكّد قدّيش حبيتنا وبعدك بتحبّنا نحنا ولادك لدرجة انّك عطيتنا ذاتك وافتديتنا بموتك عالصليب كرمال تمحي عنّا عار الخطية، اكيد كنّا ما منزعلك بأقوالنا وافعالنا يا يسوع الحبيب.

انت اللي بكيت عا اورشليم، بكيت لأنّك شفت قدّيش الانسان بعد عنّك وعن تعاليمك وبعدو عم يبعد بسبب طيشو وحقدو وعبادتو للمال وحبّو لذاتو وتفضيلا عليك.

انت اللي كان بدّك يانا نعرف حقيقة رحمة الله لإلنا، وبدّك يانا نكون أداة حبّ وفرح الله لكل انسان منلتقي فيه، وبدك يانا نزرع سلامك بالعالم اللي عايشين فيه، وخاصة بوطننا اللي، يوم عن يوم عم يفقد سلامو.

انت اللي بدك يانا نكون رسالتك بالمجتمع اللي موجودين فيه، رغم الظلم والقهر والاضطهادات غير المباشرة من الشرير اللي عم نواجها، وعم تدعينا نثبت بحبنا لإلك، ونساعد الآخرين على العودة والثبات فيك.

/الخوري يوسف بركات/