صبحية مع الرب

منرفعلك كل التسبيح والمجد والاكرام، بصباح هالاحد المبارك، يا الهنا الحبيب.

ربي يسوع، ما بعرف ليش الناس بأغلبيتن، من بداية الخلق لهلق، بيبرمو عالمناصب ومفكرين انو بالمراكز المهمّة بيحكمو الدني وبيحصلو عالسعادة، وناسيين انو المنصب الوحيد اللي بيجلب السعادة هوي بالتواضع وبالخدمة النابعين من القلب النابض بحبك.

حبّك يا ربّ اللي خلاك تنزل عن عرشك السماوي وتتواضع وتصير انسان وتعيش معنا تا تأكّدلنا انو فينا نكون معك، ونحصل عالمركز اللي بيليق فينا كأبناءك وبناتك، شرط اننا نتشبّه فيك خاصة بالتواضع وبالخدمة والمحبّة اللي ما الن حدود.

ما بعرف ليش دايما يا ربّ منصير نتحجّج بضعفنا ومنبعّدك عن يوميات حياتنا ونسعى، ولو عا حساب غيرنا، اننا نحصل عا مركز يخلينا اهم من غيرنا، بس بنظرك رح نبقى متل ما نحنا وما منقدر نخدعك.

يا الهنا الحبيب، علّمنا كيف نعيش المحبّة الحقيقية الك ولاخوتنا.

/الخوري يوسف بركات/