صبحية مع الرب

منسبّحك ومنمجّدك يا ربّ عا هالصباح اللي بتشرق فيه علينا بنور حبّك اللي ما الو حدود.

يوم عن يوم، وكل ما منتعمّق بكلامك يا ربّ، من ميلة منثبت فيك ومنزداد فرح وسلام، ومن ميلة تانية في دعوة لحمل الصليب معك بإيمان ثابت.

وكل ما منتقرّب منّك يا ربّ منتأكّد إنّو مش كل مين ما بيآمن فيك أو ما بيقبلك هوي عدو، لا بل بتدعينا بكلامك تا نقبل ونحب الجميع لأنن، ولو ما بيآمنو فيك أو رافضينك، هني ولادك واخوتنا.

كل ما منتعرف عليك اكتر واكتر يا رب منعرف انو بدنا نشتغل عا ذاتنا اكتر واكتر تا نعرف نتقبّل الآخرين وخاصة اللي آراءن ومعتقداتن بتختلف عن ايماننا فيك.

كل ما منتقرب منك يا رب منصير شهود لالك بحياتنا بالعالم.

والشهادة هيي سيف ذو حدين لانو شهادتنا فيا تكون مصدر خلاص او مصدر هلاك لإلنا وللآخرين.

الإيد والإجر وكل حواسنا هني اعضاء التواصل مع الناس جسديا وفكريا، لهيك منقدملك ياهن تا نعرف نهذّبن وننما فيك ونوصل نحنا والآخرين للحياة معك.

/الخوري يوسف بركات/