صبحية مع الرب

منرفعلك بهالصباح المبارك اعذب التسابيح واجمل التماجيد يا رب السما والارض.

تعلمنا يا رب، من أهلنا اللي سبقونا وعاشو الحياة قدامنا، انو القداسة بتجرّ القداسة والخطية بتجر الخطية، وهيك عم نكتشف ونلمس ونشوف بعيوننا انّو القداسة والخطية منهج حياة، يا منكون معك بكلّيتنا وبالنهاية منحصل عالقداسة ومننال الحياة الابدية، يا منكون بعاد عنك ومننغمس بالخطية ومنصير ابعد ما يمكن عن الملكوت السماوي.

فإذا ما امتلينا منّك يا ربّ وسلّمناك ذاتنا بفعل حب، بتصير كل حركاتنا التقوية ما الها معنى.

ما رح نقدر نفضّي ذاتنا من الشرّ ونثابر عا هالشي اذا ما آمننا انّو حبّك لإلنا وحبّنا لإلك هوي الهدف والغاية من حياتنا وعشنا عا هالاساس.

يا ربّي يسوع، نحنا بشر محدودين، وعم نسعى تا يكون حبّك هوي الوحيد اللي رح يلغي الحدود، وبيزرع بقلوبنا وكياننا الرغبة بالتقرّب منّك اكتر واكتر وخصوصي لمّن منعيش المحبة والمسامحة والخدمة تجاه كل محتاج.


/الخوري يوسف بركات/