بصباح هالأحد المبارك، منرفعلك يا رب اصواتنا وقلوبنا وعقولنا وافكارنا تا تسبّحك وتمجّدك بكل لحظة.

مينو هالعبد الامين اللي بيعيّنو سيّدو مسؤول عن بيتو واهل بيتو؟ سؤال طرحتو يا رب عالتلاميذ وعاليهود تا يعرفو انّو المسؤولية كانت مهمّة والأمانة اساسية عند هالخادم ببيت سيّدو.

اذا كان هالخادم أمين بيكون البيت آمن، وكل اللي فيه بيعيشو بأمان وكأنو سيّد البيت بعدو موجود، ومصيرو المكافأة الجيدة، بينما اذا كان هالخادم منّو أمين اخترب البيت اللي مستلمو وتشتّتو أفرادو، وصار هوي الحاكم والآمر والناهي بالبيت، ومصيرو اكيد الهلاك.

يا ربّ، السؤال رح نطرحو عا ذاتنا كل واحد وواحدة منا: قديش عنّا من هالأمانة اللي عم تطلبا من تلاميذك؟ قدّيشنا قادرين نتخلى عن ال"أنا" اللي فينا وعن حب التسلّط تا يكون الآخر وخير الآخر هدف رسالتنا وتكون انت محور حياتنا يا ربّ؟حياتنا حطّيتا أمانة بين ايدينا تا نمجدك فيها يا ربّ، بدنا نضلّ نحارب تا نكون عا قد هالمسؤولية الكبيرة.

/الخوري يوسف بركات/