مع كل نسمة هوا، بهالصباح المبارك، منرفعلك كل التسبيح والمجد يا اله السما والأرض.

قديش مهم يكون كلامك مزروع فينا متل البذرة اللي بتنما بالأرض الجيدة وبتعطي الثمر يا ربّ، بس الصعوبة إنّك تلاقي فينا أرض طيبة صالحة للزرع تا تقدر تنما كلمتك بقلوبنا وعقولنا ونعرف نجسّدا أفعال محبة ورحمة تجاه كل إنسان منلتقي فيه بحياتنا.

شو مهم نكون مستعدين، بعقولنا وقلوبنا، تا نستقبل كلامك يا ربّ ونحضنو ونتبنّاه تا يقدر ينما ويعطي ثمر صالح بحياتنا.

وتا يكون هالإستعداد حقيقي وصحيح، شو مهم نكون عم نعرف كيف نعيش الشراكة والمحبة والمساندة الروحية مع الآخرين، وما نعتبر حالنا نحنا كل شي وما حدا غيرنا بيعرفك يا ربّ.

وتا تكون عنّا هالمساندة أو المتابعة الروحية، شو مهم نكون نحنا عم نعرف كيف نشرب من نبعك ونرتوي منك يا ربّ تا نقدر نكبر ونعطي ثمر صالح، إنت اللي وفّرتلنا الأرضيّة الجيدة وعلّمتنا كيف نحب.
منشكرك يا ربّ.

/الخوري يوسف بركات/