بصباح هالأحد المبارك، ومع اشراقة نورك علينا يا ربّ، منرفعلك اعذب الحان التسابيح والمجد والشكران على حضورك الدايم بسرّ القربان وبسرّ الانسان.

يا ريتنا منعرف قديشنا صغار قدام حبّك الفيّاض يا ربّ. يا ريتنا منعترف بضعفنا تجاه عيش الحبّ ونقبل ذاتنا متل ما هيي ونرضى انك تداويها تا تشفى.


يا ربّ، انت المحبّة بكل ما للكلمة من معنى، وايماننا فيك وبمحبّتك لالنا بيخلونا نترجّى الحياة الابدية معك، انتي اللي تركت ال٩٩ تا تبرّم عن الضال قد ما كانت شرورو وبتدعيه انّو يتوب ويرجع لإلك.

يا ربّ، انت عطيتنا الحياة لأنّك بتحبنا، ووعدتنا بالخلاص وكنت امين على وعدك انّك حاضر معنا وما بتتركنا، لو مهما قويت رياح الشرير علينا.


ليش عم نضيّع فرصة العيش معك والتغذّي منك ومن حبّك، والتخلّي عن كل شي بيتقّل عا حياتنا وبيبقّينا متعلّقين بالعالم ومغرياتو.


ولا مرة نسينا ولا رح ننسى انّك بتضلّك عم بتفتّش عن الضايع منا، ما اعظمك يا ربّ.

/الخوري يوسف بركات/