منرفعلك يا رب أجمل ألحان التسابيح بصباح هالنهار المبارك يا ربّي يسوع.

كتير من الأوقات يا ربّ منكون نحنا سبب عثرة بحياة غيرنا معك، وأوقات كتيري منكون شوك وزؤان بين الزرع اللي بتزرعو من خلال كلمتك.

ومنسأل حالنا كيف أو وين عم نكون هالزؤان؟

لمّن منكون ما عم نعرف نعكس صورتك بين الناس، ونترك الشرير يغلغل فينا ويدفعنا تا نعكس صورة الأنا فينا، وبيصير التكبّر عامينا، ساعتا منكون زؤان وشوك بين الأشخاص اللي منلتقي فيون.

لمّن بيصير هدفنا بهالحياة كيف بدنا نهدم الآخرين ونسيطر عا إخوتنا بحجّة إننا منفهم أكتر منن، ساعتا منكون شوك وزؤان بمجتمعنا.

لمّن بيعمي الحقد والحسد والكراهية قلوبنا ومنصير نبرم عا تشويه سمعة الآخرين اللي بيأذونا بحجة إننا نردّلن ياها، ساعتا منكون الزؤان بكنيستك يا ربّ.

ما بدنا شي من هالدني يا إلهنا الحبيب إلاّ إنّو تكون حياتنا هون هيي إستعداد للقاءك بالملكوت السماوي.

/الخوري يوسف بركات/