مع نهاية هالأسبوع، وبصباح هالنهار المبارك، منسبّحك ومنمجّدك يا إله السما والأرض.

شو مهمة يكونو الأبرار والصديقين عم يسطعو وينورو الملكوت السماوي يا ربّ.

حياتنا كلا عالأرض، قد ما طالت، رح تبقى قصيري كتير بالنسبة للحياة الأبدية معك يا ربّي يسوع، وبهالحياة نحنا اللي منقرّر وين بدنا نكون، من خلال اعمالنا وطريقة عيشنا وتعاملنا معك بالآخرين.

وعا هالأرض، يمكن كتير من الأوقات منكون فيها مظلومين بسبب حقد أو حسد أو تكبّر من الآخرين، بس معك يا ربّ، ما في محل للظلم، ولا للحقد ولا لشي سيّء، معك يا رب، كل شي حلو وإلو معنى.

يا يسوع الحبيب، إنت اللي بتعرف شو في بقلوبنا، وإنت اللي فاحص عقولنا وبتفوت عا عمق ضمير كل واحد وواحدة منا، أعطينا إننا نعيش، عا قد ما بقيلنا من هالحياة، الشفافية والعيشة معك، بالمحبة والتضامن والصلاة، مع إخوتنا ، لنقدر نوصل لعندك ونرتاح فيك.

/الخوري يوسف بركات/