منرفعلك يا ربٍ كل المجد والشكر والتسبيح بهالصباح المبارك، ومنشكرك عا حبّك ورحمتك وحنانك اللي بتغمرنا فيون.

منتأمل اليوم بكلامك يا ربّ، اللي عم بتحطنا فيه من خلال مثل الابنين، قدام خيار مصيري ومهمّ، واللي قد ما غلطنا تجاهك وجرحنا قلبك الطاهر، اننا نختار يا منكون متل الابن اللي راجع ذاتو ورجع ساعد بيّو، أو منكون متل الابن اللي كذب وما ساعد بيو.

ايام كتير منكون متل الابن المستهتر، منسمع كلامك يا ربّ اللي بتدعينا فيه للتوبة والقداسة، ومنصير نوعدك وعود بالتغيير من ميلة، ونعيش الفلتان من تاني ميلة.

بس اليوم، رح نسعى اننا نكون متل الابن الندمان اللي عرف انو بيو بدو مساعدة وراح يساعدو، وانت يا رب بدك يانا نكون ايدك بهالعالم لنساعد بحقل الرسالة اخوتنا اللي بحاجة النا، بدك يانا نكون روحك وحبك وحنانك بين الناس اللي عم تفقد شوي وشوي سلاما. بدنا نكون سلامك بيناتن يا ربّ.

/الخوري يوسف بركات/