مع بداية زمن التهيأة، وبالأسبوع اللي عم نتحضّر فيه ككنيسة واحدة لنتجدّد ونتقدّس فيك يا ربّ، منرفعلك قلوبنا وأفكارنا وعقولنا فعل تسبيح وتمجيد.

يا يسوعنا الحبيب، انت بتعرف كل واحد وواحدة منا على حقيقتنا.

بتعرف اننا بوقت الشدّة في كتير اوقات منضعف ومنوقع، بس انت دايما حاضر يا ربّ على انّك تساعدنا بمجرّد ما نسلّمك ذاتنا بكل صدق وأمانة.

يا يسوعنا الحبيب، انت اللي تجسّدت وجيت تا تخلّص العالم وكل واحد وواحدة منا شخصيا، بالرغم من الأنانيّة والكبريا والحسد والنميمة المنتشرين بين الناس.

يا يسوعنا الحبيب، انت الهنا اللي جيت عا عالمنا، عالم الحقد والكراهية والتسلّط، تا تعلّمنا، انت الملك المتواضع والاله الحنون، انو المركز والسلطة هني خدمة، وانّو بالتواضع وبالمحبّة منقدر نملك، بأسمك، عا قلوب كتيرة ونوصّلن لعندك.

نعم يا ربّ، بدنا نحاول، بإيمان صادق، اننا نعيش متل ما انت بتريد وبتحب.

/الخوري يوسف بركات/