منرفعلك يا رب، بهالصباح المبارك اللي فيه عم تشرق علينا نورك، أعذب التسابيح وأجمل ألحان المجد.

متل زكا العشار، بتدعينا اليوم يا يسوع، تا ننزل عن عروشنا اللي متمسّكين فيها ومبعّدتنا عنّك وعن إخوتنا البشر.

متل زكّا العشّار، بتدعينا يا يسوع تا نسمع كلامك ونفوّتو عا قلوبنا تا تنوّرا لأنو كلامك نور وحياة، وفيه قوّة بتغيّر الإنسان البعيد عنّك، قوّة للشفاء الروحي، وقوّة للتحرير من الخطية، وقوّة لنتجّد ونحيا بالروح القدس.

متل زكا العشار نحنا يا يسوع، كل واحد وواحدة منّا عندو تاريخو ومسيرتو وضعفو وخطيتو، بس بلقاءنا فيك بتقبلنا متل ما نحنا لأننا ولادك بس بترفض خطيتنا لأنّك عارف بقلوبنا اللي ما بدا الخطية بس ضعفنا بيضيّعنا.

علّمنا يا ربّ إننا نتوب عن كل لحظة ما كنّا أمينين فيا، ونرجع نستعد تا نستقبلك بقلوبنا، وتسكن فيا وتعلّمنا إنّو ما نسكّر باب رحمتك عا حدا.

/الخوري يوسف بركات/