صبحية مع الرب

بهالصباح الحلو من هالشهر المبارك واللي مخصصتو الكنيسة لعبادة قلبك الأقدس ، منسبّحك ومنمجّدك يا ربّي يسوع المسيح.

منتوقف عند كلامك اليوم يا ربّ لمّن بتدعينا، بطريقة مباشرة او غير مباشرة، تا نتحضّر لبعض المواقف العدائيّة من قبل العالم تجاهنا، متل ما نحنا اوقات كتير منعاديك.

بس بمجرّد ما اخترناك يا ربّ طلعنا من هالعالم، لهيك رح يبغضنا العالم ويستبعدنا ويضطهدنا متل ما اضطهدك، وكل هالشي تا يوجّعنا ويبعّدنا عنّك ونلجأ للخطية وينسّينا انو عاقبتا الهلاك والموت.

هالصراع قوي كتير يا ربّ بين اننا نساوم مع هالعالم، نحنا وعايشين فيه ونتنكّر لإلك، وبين اننا نبقى تلاميذك ونثبت فيك رغم كل الاغراءات الموجودة.

هدفنا يا ربّ هوي التحدّي عا كل المستويات اننا نبقى معك ونقدر بوّة الروح القدس نغيّر العالم ونقرّبن لإلك من دون ما نحنا ننجرف بالعالم.

/الخوري يوسف بركات/