بصباح هالأحد المبارك وبأسبوع الصلاة كرمال يتوحّدو المسيحيين بكنيستك الواحدة، جسدك السرّي، منسبّحك يا ربّي يسوع إبن الله الحيّ.
وبهالمناسبة، تأمّلنا اليوم مع نيقوديمس ومار بولس وكل القدّيسين، هوّي صلاتك اللي صلّيتا لبيّك السماوي كرمال يضلّو تلاميذك موحَّدين، ونحنا تلاميذك.
وحّدنا يا ربّ بكنيستك.
يا ربّي يســوع، إنت اللي بالليلـة اللي واجهت فيها الموت كرمالنــا، صلّيـتَ تا يكون تلاميذك كلّن واحد متل ما الله الآب فيك وآنتَ فيه، خلّينا نشعر شوي بعدم أمانتنا ونتألّم لإنقساماتنا اللي ما إلها طعمة.
عطينا نعمة الصدق تا نوعى عا حقيقتنا، والشجاعة تا نقدر نكبّ عنّـا كل اللي فينا من لامبالاة وخوف وحسد وغيرة ونميمة، وحتى العداء بين الإخوة.
خلينا يا ربّ نجتمع ونكون كلنا واحد فيك، ونرفعلك قلوبنا وأفواهنا متل ما بتريد وكيف ما بتريد.
وهيك منلاقي فيك، يا ربّ، المحبّة الكاملة والطريق اللي ييودّينا للوحدة، بالطاعة لمحبتك وحقّك. آميـــــــن.
/الخوري يوسف بركات/
