منرفعلك يا ربّ السما والأرض، وكل ما فيها، كل التسبيح والمجد والإكرام مع إشراقة نور هالصباح.
شو حلوة، يا ربّ، نرجع نصير أطفال ، ولكن بالروح ومش بالعمر، لأنو روحانيّة الطفل أجمل وأكتر براءة من روحانيّتنا نحنا الواعيين.
شو حلوة يا ربّ، تكون عنّا روحانيّة هالطفل اللي بيقبل كل شي منعطيه ياه.
شو حلوة يا بيّنا، نكون متل هالطفل الصغير اللي مستسلم بحضن أهلو ، مسلّمينك ذاتنا ومتأكّدين إنّك ما بتعطينا إلاّ كل شي خير لإلنا.
وشو حلوة يا إلهنا الحبيب، تكون عنّا هالطفولة الروحيّة اللي هيي الضمانة الوحيدة تا نقدر نحصل على كل شي بيفيدنا وبينفعنا وبيقدّسنا.
بس تا يكون عنّا هالروحانيّة، منعرف إنّو عنّا شغل كتير، ورح نحاول نتخلى عن عبادتنا لذاتنا ولكل شي ما إلو نفع وبيأذيلنا حياتنا وبيخرب علاقتنا فيك يا ربّ يسوع.
/الخوري يوسف بركات/
