السما بملايكتا وقدّيسيها، والأرض بسكّانا وخلايقا، كلّن بصوت واحد، وبقلب واحد، وبفكر واحد، بيرفعولك التسبيح والمجد والشكر عا هالصباح الجديد وهالنهار المبارك يا إله السما والأرض.
ولا مرّة فصلت يا يسوع بين العلاقة مع الله الآب والعلاقة مع إخوتنا اللي حوالينا.
لأنّو كل علاقة مع الناس اللي منلتقي فيون بترتكز عا علاقتنا فيك.
وإنت علّمتنا يا ربّ إنّو كل علاقة مع الله ما بتكتمل إلاّ بعلاقة مصالحة مع إخوتنا ومع بعضنا البعض، بالرغم من الصعوبات اللي بتواجهنا وبتعترض مسيرتنا معك يا ربّ وما بتخلينا نعيش الأخوّة بعضنا مع بعض.
كتير من الأوقات ، منفوت بسوء تفاهم بعلاقاتنا، وأوقات بيدخل كبرياءنا بالنص وما بيعود يخلينا نعمل فعل تواضع ونتنازل تا نعيش الشراكة، وبتكبر الهوّة وما بتعود تتسكّر من ورا عنادنا، بس بتبقى المصالحة أجمل وأنبل عمل منعملو تا نربحك يا ربّ بإخوتنا وأخواتنا.
/الخوري يوسف بركات/
