صباح الخير يا إله الخير، صباح النور يا نبع النور، صباح الأمان يا ميناء الأمان، يا إلهنا الحبيب يسوع المسيح.
كلامك هادف ومصيري يا ربّ لمّن بتحطنا قدّام الخيار الأنسب وبتتركنا نحنا نختار، يا منعترف فيك قدّام كل الناس ومنمشي بحسب تعاليمك ووصاياك ومنحصل عالسعادة الأبديّة، أو مننكرك قدّام الناس ومنصير نعبد غير آلهة كرمال لذّة أو طمع أو غنى موقّت، ومنخسر الغنى والفرح الدايم والأبديّ.
إنت اللي تاركلنا مكان لكل واحد وواحدة منّا بالملكوت بحضن الله الآب بشرط إننا نعيش الإيمان الثابت والكامل فيك ونتّكل عليك ونستسلم بين إيدين الروح القدس الرفيق والمعزّي، واللي بيدافع عنّا وبيحمينا من كل تجارب أو شرّ، وبيحسّسنا بالأمان.
يا ربّي يسوع، إنت فرحنا وسلامنا وحبّنا وحياتنا، وكلنا إيمان وثقة إنّك حاضر معنا، ورح نسعى تا نشوفك ونحبّك بإخوتنا وخصوصي اللي صعب علينا نتقبّلن.
/الخوري يوسف بركات/
