شو منفرح يا ربّ لمّن منشعر إنّك حاضر معنا وبعدك عم تشرق نورك علينا رغم كل السقطات اللي عم نوقعا وعم نأذي قلبك فيها.
صعب كلامك يا ربّ لمّن بتدعينا تا نبيع كل شي منملكو ونتجرّد عن كل الأرضيات، بس الأكيدين منّو إنّك ولو دعيتنا للتجرّد بتبقى مأمّنلنا كل شي منحتاجو بحياتنا عا هالأرض، والأهم إنّك عاطينا قلبك، وجسدك ودمك أجمل وأطيب غذاء.
صعب كلامك يا ربّ لمّن بتدعينا تا نعطي من ذاتنا، ولو نحنا بحاجة، لكل المحتاجين للمال أو للمسة حب وحنان ورحمة وعطف، لأنّك إنت اللي علّمتنا كيف نحب ونرحم ونسامح ونعيشك بين الناس.
صعب كلامك يا ربّ لمّن بتدعينا للإستعداد الدايم للقاءك، وخصوصي لأننا ما منعرف وقت اللقاء فيك ولا الساعة.
بس الأهم إننا عم نسعى تا نكون عم نعيش بحسب قلبك ونستحق الطوبى الحقيقية منّك.
/الخوري يوسف بركات/
