مع كل نقطة ميّ بهالشتي اللي عم تنعم علينا فيه يا ربّ، خالق الدني كلّا، قلوبنا بترقص فرح فيك يا إلهنا الحبيب وبتنشدلك أجمل ألحان الشكر والتسبيح.
شو هالنار الدافية والمليانة حنان، واللي جيت عا هالأرض يا ربّ يسوع تا تعطينا ياها، هالحنان اللي خلاك تنحني علينا وتغمرنا بحنانك وتملينا منو تا نقدر بدورنا نحنّ عا إخوتنا اللي بحاجة لإلنا.
شو هالنار اللي ما بتحرق لأنّها مليانة حبّ، واللي ملّيت الأرض والدني كلّا منّو لأنك إنت الحبّ الحقيقي يا يسوعنا الحبيب، هالحبّ اللي خلاك تنزل من سماءك وتعيش معنا وفينا وتعلّمنا كيف نحبّ رغم ضعفنا البشري اللي بيحاول يخلينا نستسلم للبغض والكراهية.
شو هالنار اللي لبسناها لمّن تعمّدنا، هالمعموديّة اللي بتخلينا نموت عن إنساننا القديم، إنسان الـ "أنا"، ونلبس الإنسان الجديد، إنسان الـ "نحن"، تا نقدر نعيش جماعة واحدة بتعرف تحبّك لمّن منحبّ بعضنا البعض.
/الخوري يوسف بركات/
