صبحية مع الرب

بصباح هالأحد المبارك، منرفعلك كل التسبيح والمجد يا ملك المجد.

اوقات كتير منصير نتساءل كيف كانو الرسل والقديسين يعيشو، كيف صارو قديسين وبأيّا طريق مشيو تا صارو قدّيسين، وشو اللي عملوه غير عن اللي عم نعملو تا خلّاهن يصيرو قديسين؟الجواب بتعطينا ياه بوضوح بس نحنا اوقات كتير ما بدنا نفهمو بإنّن مش مختلفين عنّا، لا بل هنّي متلنا بس بيتميّزو عنّا بقراراتن وتفكيرن.

هنّي وعيو على إنّو سرّك يا ربّ ما ممكن ينفهم الا اذا كانو بسطاء، بينما نحنا بدنا نحجّمك بتفكيرنا.

هنّي عرفو انّو القداسة طريق مليانة بالوداعة والتخلّي عن الذات تا يمتليو فيك، بينما نحنا بدنا ياك لإلنا وتقدّسنا متل ما نحنا بدنا.


يا ربّ، عرفنا انّو اذا بدنا نكون قديسين، بدنا نشتغل عا حالنا ونتواضع ونطلع من ذاتنا تا نعرفك ونحبّك ونسمعك ونفهمك ونلتقي فيك من خلال حبّنا للآخر.

/الخوري يوسف بركات/