بهالصباح المبارك، منرفعلك يا ربّ كل التسبيح والمجد والشكر عا محبّتك اللي ما بتنتهي لأبناءك وبناتك.
يا يسوعنا الحبيب، نزولك من السما، وتخلّيك عن عرش مجدك، تجسّدك عا هالأرض، منّو إلّا حُبًّا فينا وتا تشفينا وتشفي البشريّة كلّا.
يا إلهنا الغالي، من بعد ما شفيت الناس بيوميّاتن، وحتى بعلاقاتن بعضن مع بعض، وبعد كل الوقت اللي بقيو فيه معك، جاعو، بس جوعن كان لإلك ولكلامك ولحبّك، لأنّو كلامك فية غذا وحياة.
وبكلامك يا يسوع أخدت ذاتنا وعطيتنا ذاتنا، أخدت حياتنا وسكبت فيا حياتك تا تحيينا وتخلّصنا، وأهم عطاءاتك كانت ذبيحة الصليب، حبًّا فينا وكرمالنا.
ومتل ما رفعو تلاميذك الفضلات من الخبز وكانو حاملينك للعالم، نحنا كمان يا ربّ، كلنا رجا إننا نكون عم نعرف نحملك ونقدّمك لكل اللي منلتقي فيون وتكون إنت مصدرنا وغايتنا وهدفنا بهالحياة.
/الخوري يوسف بركات/
