بصباح هالأحد الفارح من هالصوم المبارك، منرفعلك يا ربّ آيات الحمد والتسبيح، ومنشكرك عا هالنهار الجديد بحياتنا.
من بعد ما نشوفك عم تشفي أعمى أريحا، منسأل حالنا اليوم يا ربّ شو بدنا ياك تعمل لإلنا؟ شو بيجي عا فكرنا نطلبو منّك؟ عم نكون جسديين بطلباتنا، واللا عم نرتفع صوبك تا تعطينا الخلاص والملكوت؟
متل ما كان أعمى أريحا مُبعَد عن المجتمع بسبب مرضو، هيك نحنا كمان يا يسوع بعدنا بعاد عن الملكوت بسبب ضعفنا وخطايانا، اللي عم تنجح بكتير من الأوقات إنها تجذبنا للأرض ولشهواتا.
أعمى أريحا كان أعمى العينين بس، وما كان اعمى القلب لأنو عرفك وركض صوبك، هيك نحنا يا يسوع كمان بدنا نتعلّم من هالأعمى كيف نفتحلك بصيرة قلوبنا ونعرف الحقيقة ونمشي الطريق، انت الطريق والحق والحياة.
/الخوري يوسف بركات/
