صبحية مع الرب

بهالصباح المليان محبة وحنان، منسبّحك ومنمجّدك يا الهنا الحنون والرحوم.

متل ما كنت قاسي يا ربّي يسوع عالكتبة والفرّيسيين اللي كانو عم يشكّكو الناس ويعلّموهن تعاليم غلط عنّ المحبة والتسامح، هيك نحنا كمان، علينا المسؤولية،

وحتى الملامة، بكل مرّة منكون فيها عم نعيش بحسب اهواءنا ورغباتنا وانانيّاتنا مع الاشخاص اللي هنّي ناطرين منّا كلمة تعزية او حتى لمسة محبّة تعكس ايماننا فيك.

نجيّنا يا ربّ من روح العالم اللي آخرتو الويلات اللي بتحرمنا من اننا نفوت عالملكوت السماوي ونتنعم بالسعادة الابدية معك.ومتل ما الطفل بريء ومليان حياة، منطلب منك يا روح الله القدّوس انّك تقوينا وتعطينا النعمة على انّو تكون عنا براءة الاطفال، نبتعد فيها عن المشكّكين، ونعيش المحبّة تجاه الآخرين، وبدورنا كمان ما نشكّك حدا بطريقة حياتنا كمسيحيين.

/الخوري يوسف بركات/