الخليقة كلّا بتسبّحك يا ربّ، وبتشكرك عا هالصباح اللي بتشرق فيه نورك علينا.
اليوم يوم لعازر، هالإنسان اللي حبّيتو كأخ وصديق يا ربّ، ورجّعتلّو الحياة، وغيّرت نظرة كتير من اللي كانو معك تجاهك، وعرّفتن قدّيش مهمّة الصداقة والمحبّة اللي ما فيها مصلحة.
اليوم يوم لعازر، هالإنسان اللي كان عايش معك يا ربّ، وعم يتتلمذ عا إيديك تا يقوى وينما بالنعمة والحكمة والقداسة.
بس اليوم ما عم نعرف نكون لعازر، ولا عم نتعلم كيف نبني علاقة صداقة معك يا يسوع، ما عم نعرف نجي لعندك ونخبرك أفراحنا وأتعابنا وأحزاننا.
يا ربّ، اليوم ما عم نعرف نكون لعازر، بس رح نحاول، بإتكالنا عالروح القدس، ناخدك المعلّم الأوحد بحياتنا وتكون قدوتنا وطريقنا وهدفنا وغايتنا وكل شي حلو بحياتنا.
/الخوري يوسف بركات/
