صبحية مع الرب

قديشنا بحاجة يا ربّ لحبّ مليان صدق؟ قديشنا بحاجة لتواضع عميق وحقيقي.

قديشنا بحاجة اننا نقول الحقيقة متل ما هيي بكل احترام وبحسب قلبك، ومن دون تلفيق اخبار وقصص عالآخرين.


شو بينفعنا، يا ربّ، اننا نحب وما نكون عم نحكي الحقيقة بصدق؟ اكيد رح منكون عم نساوم ونجامل.


وشو بينفعنا، يا ربّ، اننا نحكي الحقيقة من دون ما تكون المحبّة غامرة قلوبنا؟ اكيد رح بتكون دينونتنا قاسية.


شو حلوة وعميقة ونافعة وهادفة حياتنا لمّن بتكون عم تتّوّج بالمحبّة المرافقة للحقيقة، وما بدنا نكون متل الفرّيسيين نرفض التوبة والمحبّة.


يا ربّ، زيدنا من مواهب روحك القدّوس، واعطينا على اننا نعيش المحبّة متل ما انت بتطلب منّا، وما نساوم عالحقيقة، ونحكي الصدق بكل امانة ومحبّة وبهدف خلاص الأخرين.

/الخوري يوسف بركات/