بصباح هالأحد اللي فيه عم بتسلّم الرعاية لمار بطرس، منرفعلك يا ربّ كل التسبيح والمجد، ومنشكرك عا محبّتك الكبيرة اللي بتحبّنا ياها.
يا ربّ، بمسيرتنا معك رح نمرق بتجارب متل اللي مرق فيها الرسل وخاصة بطرس اللي يعد ما عبّر عن حبّو لإلك خاف ونكرك، وتراجع شوي متل كل التلاميذ اللي نكروك ببستان الزيتون ووقت الصلب، خافو وهربو.
يا ربّ، نحنا منعرف إنّو مسيرة الإيمان فيك صعبة وفيها كتير من المصاعب والمخاطر، بس نحنا بدنا ياك تا تعطينا الراحة والهدوء والسلام الداخلي.
وبكتير من الأوقات منشعر متل الرسل اللي اتكلو عا حالن وما صابو شي، بس حياتنا معك يا يسوع هيي مش مشروع فاشل وما فيه ثمر، لا بل هيي مشروع ثمارو الفرح والسلام والأمل والمحبّة.
حضورك معنا يا ربّ بيزيل خوفنا ويأسنا، وكلمتك بترسملنا الطريق وبتعزّينا تا نكمّل المسيرة معك ونحبّك.
/الخوري يوسف بركات/
