صبحية مع الرب

بصباح هالأحد المبارك منرفعلك كل التسبيح والتمجيد يا ربّي يسوع.

شو هالمهمة الصعبة اللي بعتتن فيا لتلاميذك، ونحنا من بيناتن، اننا نبشّر فيك وبكلمتك بين العالم اللي ما بترحم، وخصوصي اللي منن قابلين يعترفو فيك.

بس كمان في ذئاب كاسرة واساسية بحياتنا وهيي ذاتنا، بشهواتا وبغرائزا.

دايماً بتحاول تنهش فينا الفضايل اللي زرعتا فينا، وأهما فضيلة الصدق والبراءة، ومنصير نغرق بالشرّ بالفكر وبالقول وبالفعل.

كمان يا ربّ عم نتصارع مع ذئب الأنانيّة والكبريا والكراهية والغضب اللي بيحاولو يشدّونا على اننا نتملّك كل شي منشوفو ، وبيصيرو ياخدو مننا اجمل الفضايل اللي زرعتا فينا وهيي التواضع والمحبّة والرحمة والفرح.

بس نحنا معك يا ربّ، وبقوّة روحك القدّوس، رح نتغلّب عليها بحياتنا، ونشهد لإلك بكل صدق وأمانة.

/الخوري يوسف بركات/