صبحية مع الرب

شو بدنا أجمل من هيك صباح لمن بيبتدي بتسبيحك وتمجيدك يا ربّي يسوع؟

عظيم أمرك يا ربّ، انتي اللي بتعرف داخل الإنسان قبل خارجو، لهيك ما بيقدر الإنسان يتخبى من قدام وجّك الحنون.

عظيم أمرك يا ربّ، إنت اللي وضّحتلنا وعم ببتوضّحلنا دايماً كيف بيختلف التديّن بين البشر، هيدا اللي بدو يضل عا علاقة سطحية معك، وهيدا اللي بدّو ياك تكونو متل ما هوّي بيتصوّرك وعا ذوقو وعا مزاجو.

عظيم أمرك يا ربّ، إنت اللي تقبّلت كيف بيبادلوك الناس عا محبتك بالإهمال، كيف بيصيرو يصنعو منّك صنم، بيعبدوك وقتا بدن وكيف ما بدّن وبيرفضوك لمّن ما بيعودو بحاجة لإلك.

عظيم أمرك يا ربّ، إنت اللي بتسامح، وبتبني علاقة حبّ وفرح وسلام مع اللي بيأذوك.

عظيم كيف بتحبنا رغم الإهانات والتجريحات اللي عم نجرح قلبك فيون.

علّمنا إننا نحبّك مش بس بالقول، بالفعل كمان.

/الخوري يوسف بركات/