صبحية مع الرب

صباحنا اليوم مليان سلام وفرح معك يا ربّي يسوع.

عجيب أمر الإنسان يا ربّ، قديش كنت حاضر مع تلاميذك؟ وقديش كنت عم تعمل العجايب قدامن؟ وخصوصي تكسير الخبز، وبعدن منن مآمنين بحضورك كألله بيناتن.

شو غريبين هالتلاميذ اللي بيفقدو الثقة فيك، انت المعلّم، بسرعة، هالثقة اللي بنيتا معن عالصداقة والمحبّة والخدمة بدون مقابل.

ونحنا يا ربّ منا غريبين عن هالتلاميذ، دايما مننسى، وبسرعة جنونية، اول شي حضورك الدايم بيناتنا ومعنا، وتاني شي كل اللي عملتلنا ياه.

اليوم، وكل يوم، بترجّعنا يا ربّ، لذاكرة الخلاص بكل لحظة من لحظات حياتنا، وبتذكّرنا بعيونك الساهرين علينا وبمحبّتك وبعنايتك الأبوية لإلنا.

وشو في اجمل من اننا نشكرك عا محبتك ورحمتك ونقدملك كل شي منعيشو عا هالارض من اقوال وأعمال حياتية، ولو جزء بسيط، عربون حبنا الك.

/الخوري يوسف بركات/