صبحية مع الرب

مع بداية هالصباح اللي فيه بتشرق نورك علينا يا ربّ، منسبّحك ومنمجّدك عا كل نعمك وعطاياك.

يا ربّ، شو هيي دينونة هالعالم؟ وايمتى صارت؟ وشو رح بيصير فينا؟ وويننا نحنا من هالدينونة؟أسئلة كتيرة الناس بيطرحوها عا حالن وعليك يا ربّ بركي بيطلعلن جواب.

بس المشكلة هيي عند اللي ما بيآمنو فيك، او عند اللي حاطّين العلم والفلسفة الأساس، هودي ما رح يلاقو جواب. بس عند اللي بيآمنو فيك الجواب بيلاقوه فيك انت اللي جيت ومتت عالصليب تا تحقق هالدينونة لأنّك الملك اللي طردت سيّد هالعالم وكلّ جنودو بموتك وقيامتك.

ولمن ارتفعت عالصليب يا ربّ خلّصت بجسدك ودمك كلّ البشريّة اللي كانت ضايعة وواقعة تحت سلطان الخطية، وطهّرتا بنار الالوهة.

ضوّي علينا بنورك الازلي يا ربّ، وروينا من نبع حبّك اللي ما بينضب، ونجّينا من دينونة البعد عنّك تا نقدر نعبر لعندك ونتلذّذ بملكوتك الابدي.

/الخوري يوسف بركات/