صبحية مع الرب

بصباح هالنهار المبارك منسبّحك ومنمجّدك يا ربّي يسوع.

شو هالشيطان المتربّص عا بواب قلوبنا وناطر تا يتغلل ويبعدنا عنّك، بس عنّا ملء الثقة إنّو الروح القدس كمان حاضر انّو يدافع عنّا وما عم بيخلّيه.

يا ربّي يسوع، صعب علينا إننا نصمد لحالنا بوجّ هالشيطان ونحسّ بالسلام، بس بإتّكالنا عالروح القدس وبإتّحادنا فيك رح نعيش بسلام داخلي معك.

يا ربّي يسوع، ولا يوم رح نفكّر انّو اذا فلّتنا من تجربة الشيطان مرة او تنين او عشرة يعني خلص ارتحنا، وهيدا اللي بتنبّهنا منّو، وبتدعينا اننا نكون حذرين من كل هجماتو اللي رح بتكون اقوى من اللي سبقوها.

يا ربّي يسوع، صارت دارجة موضة عدم التصديق بوجود الشيطان، مع إنّك انت اللي أكّدتلنا هالوجود، لهيك، كل اللي بينكر وجودو بيعطيه اقوى سلاح تا يحاربنا.

بس نحنا سلاحنا هوي العمل بكلمتك يا ربّ، والسهر بالصوم والصلاة تا نردّو عنّا ونبقى معك.

/الخوري يوسف بركات/