صبحية مع الرب

بهالصباح المبارك منسبّحك يا ربّ تسابيح بتليق بوقارك.

كلماتك وتنبيهاتك يا ربّ، ولو كانت قاسية شوي بمحلات كنير من الانجيل المقدس، وخصوصي لمّن بتتوجّه فيّا للفريسيين والكتبة اللي معتبرين حالن افضل من غيرن، هني لخيرنا وبيوعّونا عا حقيقة واحدة هيي عيش المحبّة والتواضع متل ما انت عشتن برسالتك معنا عالأرض يا ربّ.

ما بدنا نكون فرّيسيين بنظراتنا تجاه الآخرين، وما بدنا نعيش الفوقية مع الآخرين وخصوصي المختلفين عنّا، مادّيا او دينيا او فكريا او اجتماعيا.

ما بدنا نكون فريسيين بحطّ اللوم عالآخرين بكل شي عم بيصير معنا او بمحيطنا، لأنو عنّا الاستعداد اننا نهرب من تحمّل مسؤولية اخطاءنا.


ما بدنا نكون فريسيين او كتبة بحياتنا، ندّعي المعرفة وكاّننا مالكينك يا ربّ.

كل اللي بدنا ياه اننا نكون تلاميذ حقيقيين إلك، نحب متل ما انت حبيتنا.

/الخوري يوسف بركات/