صبحية مع الرب

بصباح هالنهار المبارك، منرفعلك كل التسبيح والشكر يا ربّي يسوع.

منسمعك يا ربّ عم بتأنّب الكتبة والفريسيين وترجعن لذاتن ولضمائرن بالويلات اللي كنت عم بتسكبا عليون، لأنن هنّي القادة اللي كان لازم يمشو قدّام رعيتن وما كانو قد المسؤولية.

منسمعك يا ربّ عم تتّهم الفرّيسيين والكتبة بإنن قادة بس المشكلة الكبيرة انن قادة عميان وعم بيقودو الشعب اللي هوي بدو مين ينوّرو، فصارو عميان عم بيقودو عميان، وهون الخراب الأعظم.

هنّي القادة العميان اللي ما عم بيشوفو الا القشور والذهب بالهيكل وبيتناسو الهيكل، مركز حضورك بين شعبك، يا ربّ.

ومنسأل حالنا دايما اذا عم نكون متل هالكتبة والفريسيين بعلاقتنا فيك يا ربّ.

واذا هيي مبنيّة عالقشور، عا ترداد الصلوات من دون معنى، او عالتفاخر بأعمال الخير. ما بدنا الا حبّك يغمرنا يا ربّ.


/الخوري يوسف بركات/