صبحية مع الرب

بصباح هالأحد المبارك، منرفعلك اناشيد التسبيح والتمجيد والشكر يا الهنا الحبيب.

قديش كانت هالمرأة الكنعانية عم تتعذب لعذاب بنتا اللي كان عم بيعذبا الشيطان، ومع هيدا وكلّو ما استسلمت لا بل بقيت تبرم عالخلاص لإلا ولبنتا ولقيتو عندك يا ربّي يسوع.

قديش كانت هالمرأة الكنعانية مؤمنة فيك يا ربّ من قبل ما تسألك الشفاء لبنتا، والنتيجة انّك حقّقتلّا مطلبا من بعد ما شفت ايمانا العميق والكبير.

قديش كانت هالمرأة الكنعانيّة متأكدة من قدرتك عا طرد الشيطان من بنتا، لهيك اجت بكلّيّتا وسجدت قدّامك واعترفت فيك الملك ابن الملك والله معنا اللي جيت تا تعطي الخلاص لكل انسان بيطلبو بإسمك يا ربّ.

قديشنا بعاد عن ايمان هالمرأة الكنعانيّة، نحنا اللي عم نشوفك عم تتجلى دايما لإلنا وناطر تا ندخّلك عا قلوبنا وعا حياتنا تا تطرد منها كل شي بيبعدنا عنك.

/الخوري يوسف بركات/