صبحية مع الرب

منسبّحك ومنمجّدك ومنعظّمك يا ربّ عا نعمك وعطاياك اللي بتفيضا علينا مع كل اشراقة صباح.

ربّي يسوع، لمن منخطا ومنستقبل التجربة بكلّ صدر رحب، بتتملّكنا الخطيّة وبتخلينا متل هالمرأة المنحنية الضهر.

ولمّن منرتكب الخطية يا ربّ، الشيطان بيربطنا وبيكبّلنا.

وبكتير من الطرق، ما بيعود يخلّينا نتوب ونرجع نلاقي فرحنا عندك.

يا ربّ، لمّن منكون بالخطية، بيصير هدف حياتنا ناكل ونشرب وننام وبس، بينما بلمسة واحدة منك بتشفينا من عبوديّة الشيطان المتمثّل بالخطيّة، متل ما لمست المرأة المنحنية الضهر.نحنا ما خلقنا تا نأدّي خضوعنا للشيطان، لا بل تا نرفع عيوننا وقلوبنا صوبك يا ربّ تا ما نضيّع الطريق ونصير نفتّش عن السعادة بعيد عنّك.

نحنا تلاميذك يا ربّ، ورسالتنا اننا نمجّدك بكل عمل منقوم فيه وبكل كلمة بتطلع من تمنا.


/الخوري يوسف بركات/