صبحية مع الرب

ببداية هالأسبوع المبارك، ومع إشراقة هالصباح، منرفعلك كل التسبيح والتمجيد يا ربّ السما والأرض.

مينو هيدا هيرودس يا ربّ تا كان عم يتهدّدك ويحتال متل الثعلب اللي بيصلي تا يفترس القطيع؟

مينو هيرودس اللي كان خايف عا مركزو لا يخسرو بسبب الناس اللي آمنت فيك ولحقتك؟

مينو هيرودس اللي وصل عالسلطة عا حساب إخوتو اللي همّشن وقتلن وسجنن كرمال السلطة.

بس إنت يا يسوع ما كان بدك تواجه هيرودس لأنّو بعد ما صار وقت إنّك تتمجّد، بس أكيد غيّرتلّو نظرتو ونظرة العالم تجاهك من خلال تواضعك.

هيرودس هوي كل واحد وواحدة منّا لمّن منرتكب الخطية وبتصير مشروع حياتنا.

هيرودس هوي نحنا لمّن الحقد والكراهية بيعمولنا قلوبنا وعقولنا وبتصير الأنانية مشروع حياتنا.

ما بدنا نكون هيرودس يا ربّ، بدنا نتمثّل فيك ونسعى على إننا نعيشك بكل صدق وأمانة.

/الخوري يوسف بركات/